ఇరానీ కేఫ్ - Irani Cafe

ఆగస్టు 2018. ఆంధ్రప్రదేశ్ మాస పత్రికలో నా కథ 'డ్రాఫ్ట్ బాక్స్' వస్తే అమ్మకు చూపించా. 68 పేజీల పుస్తకం అది. 50వ పేజీ నుంచి మూడు పేజీలు నా కథ ఉంది. ఊరికనే అందులో ఉన్న నా ఫొటో చూపించి ఆ పత్రికను పక్కన పడేశా. అమ్మ చదువుకోలేదు. నా ఫొటో చూసి నవ్వింది అంతే. మధ్యాహ్నం ఎప్పుడో నేను బయటికెళ్లి తిరిగొచ్చినప్పుడు ఆ పత్రికను తిరిగేస్తూ కనిపించింది. ఓపికగా ఒక్కో పేజీ తిప్పుతూ 50వ పేజీ దగ్గరికొచ్చి ఆగింది. అందులో నన్ను చూసుకొని, కాసేపు నా ఫొటో మీద చెయ్యి ఉంచి, తడిమి చూసి ఆ పత్రికను పక్కన పడేసింది. నేనెందుకు కథలు రాస్తున్నానని అడిగితే, బహుశా ఇందుకేనేమో!

- వి. మల్లికార్జున్